L'angolo della poesia - O' mercato (d' 'o rione Berlingieri)

Foto di Sara Sorrentino

‘O martedì ‘e mmatine ‘int’’o rione

Ce sta n’appuntamento ‘a nun mancà

Si vuo’ n’affare o sul’ pe’ guardà

Nu giro int’’o mercato è tradizione.

‘E ‘llucche ‘e ssiente d’’a matina ambressa

Robba bella, robba bbona, pigliate!

N’ata offerta accussì nunn ‘a truvate!

Si nunn’approfittate site fesse!

Sotto ’o sole, cu’a folla e c’’o burdello

E sempe annanz’’e piede ‘e ccarruzzine

Ognuno s’allamenta p’’a ammuina

Però se guarda tutte ‘e bancarelle.

Nun sulamente da Secondigliano

‘Nce truove a spasso ‘e mmamme cu’e figliole

Aropp’ lasciate ‘e creature a scola

Pure ‘a Casoria, Cas’vatore, Arzano.

E pure mo’ ca sto in terra straniera

‘A pecundria me vene d’’a matina

Pensanno a mmamma, a sorema e ‘a ammuina

‘E chist’evento ‘o Rione Berlingieri.

Poste, gente e abitudini song’ate

E ccà pure ‘sta cosa mo' me manca

Ma ancora ‘o martedì addo’ vaco vaco

Sempe rimmane ‘o juorno d’’o mercato.

Poesia di Immacolata Sarnataro